كشفت الفنانة كارمن سليمان عن تفاصيل مثيرة للمرة الأولى عن حياتها الشخصية وعن أهم المواقف التي حصلت معها في حياتها العملية والإجتماعية وذلك خلال حلولها ضيفةً على برنامج AB talks، مع الإعلامي أنس بوخش.

وقالت سليمان خلال حوارها: "اتجوزت بدري وأنا عندي 22 سنة كنت طفلة شوية، وميزة الموضوع ده إن مفيش فرق كبير بيني وبين زين ابني، لكن أنا شايفة الجواز لازم يكون في سن الـ 26 أو 27 سنة، والراجل ميتجوزش قبل سن الـ30، ومبأيدش أبدًا فكرة الزواج المبكر".


و أضافت" حصلت حاجات كتير صعبة عليا في حياتي العملية، ودا حصل عشان متعودة من وأنا صغيرة كل حاجه تتعملي مش متعودة أعتمد على نفسي أوي فحصلي حاجات معرفتش أتصرف فيها، ومحتارة وخايفة لأن المجال صعب".

و تابعت" أنا كنت متعودة من وأنا صغيرة خاصة بعد ما سجلت ونجحت ببرنامج آرب أيدول إن في حد ماسكلي شغلي دايما، وبيتفق مع الناس وبيعمل كل حاجة، والشخص ده كان امي وأبوية، وبعد أبوية كان مصطفى جاد زوجي".

و استكملت كارمن حديثها قائلة: "لكن في وقت جه مصطفى وقالي إحنا كبرنا خلاص والمفروض تنزلي الاستديوهات وتتابعي شغلك بنفسك، ونشوف مدير أعمال ليكي علشان أبدأ أشوف شغلي أنا كمان، وفعلا أنا قبلها ماكنتش بحضر الأغاني بتاعتي وهي بتتعمل في الاستديوهات، ومصطفى وقبلها بابا هما اللي كانوا بيتولوا كل ده، وأنا لما نزلت وشوفت الاستديوهات وحضرت صناعة الأغاني كان الموضوع غريب جدا بالنسبالي في منتهى الغرابة لأني أنا مش دارسة مزيكا ومش فاهمة وكله كان كده بالحب يعني، وكنت وقتها عملت شوط كبير، وكانت كل دي أغاني أنا مغنياها بس ومعرفش حاجة فيها غير إني غنيت".