أثارت ياسمين عز مقدمة برناج "كلام الناس" جدلًا واسعاً على منصات التواصل الاجتماعي بعد تطرقها للحديث عن قضية خيانة بيكيه لشاكيرا وإصدار الأخيرة كليب يحمل رسائل مبطنة لطليقها لاعب كرة القدم المعتزل جيرارد بيكيه.

ووجّهت ياسمين عز رسالة خلال حلقتها إلى شاكيرا: "عاملة زي المفتش كرومبو، مش يمكن جوزك سكره بيوطى من عمايلك وأخد معلقتين مربى، نسيبه يغمى عليه ويموت عشان ترتاحي؟ إيه البخل دا؟ انت عايشة برا يعني التكنولوجيا كلها وتقدري تعرفي لو فيه ست دخلت بيتك ولا لا من الكاميرات، هو إحنا عايشين في الغابة؟ إيه لازمة التشهير بجوزك الأشقر المحترم، ليه أجرتي واحد يراقب جوزك إيه لازمة المصاريف؟ أومال لو أكل علبة الجبنة كنتي عملتي فينا إيه؟ يا عيني عليك يا بيكيه".




وتابعت ياسمين عز: عاملة أغنية لحماتك؟ هي دي الأخلاق يوم ما تطلقي تقلبي عليها؟ دي كانت شايلاكي في عينيها، أنتي مصدقة نفسك؟ دا أنت كنت بتحسسي بيكيه إنك أعلى منه، واللي بيسيب حد وبينساه مش بيعمله أغاني، لأنه مطلبش يرجعلك أصلا، اللي بيطلع حد من حياته بجد بيعتبره طفاية وهو مبيدخنش يعني وجوده زي عدمه.



وأضافت: أي ست متجوزة راجل محترم لو إنتي بتشتغلي مديرة وهو موظف ورجعتي من شغلك سيبي وظيفتك برا باب الشقة، وادخلي زوجة فقط، إنتي مش أعلى منه دي موضة ولا إيه؟ عمرنا ما سمعنا بيها من أيام جدتنا؟ أخدتيه من الأول ليه؟ لما إنتي هتتقنعري عليه؟ فرعونّا المصري مفيش زيه في العالم دا انتي عايشة في خيره.


ووجّهت ياسمين عز نصيحة للزوجات: عملوا دراسة وقالوا لو المرأة أكلت معلقة عسل يوميا هتبعدك عن الطبيب، ما بالك إنتي جنبك برطمان العسل، جوزك فرعونك، عندك مصدر خلية النحل، دا لو لمس الشاي هيحليه، تجيبي سكر ليه وهو موجود؟ ولما تغازليه ابتكري واستخدمي الغزل المطبخي، دا جوزك راجلك شرعًا وحلالًا ومش بقولك دلعي راجل معدي في الشارع، أنا بتكلم عن المخطوبين والمتجوزين.